மேட்டூரில் வெளி ஆட்களை வைத்து மது விற்பனை செய்ததால் டாஸ்மாக் மேற்பார்வையாளர் பணி இடைநீக்கம்!சேலம் மாவட்டம் மேட்டூர் அருகே உள்ள புதுசாம்பள்ளி குருவாகாடு என்ற இடத்தில் டாஸ்மாக் கடை செயல்பட்டு வருகிறது. இந்த மதுக்கடைக்கு மது அருந்த வர்த 2 பேர் மது வாங்கியுள்ளனர். அப்போது, கடைக்குள் விற்பனையாளர்கள் பணியில் இல்லாமல் வெளி நபர் ஒருவர் அமர்ந்து மது விற்பனையில் ஈடுபட்டிருந்தார். மேலும், அவர்கள் கடைக்குள் இருக்கும் அந்த நபரிடம் நீங்கள் டாஸ்மாக் ஊழியரே கிடையாது,அடையாள அட்டையை காட்டுங்கள் எப்படி கடைக்குள் அமர்ந்து மது விற்கலாம் என்றும், குவார்ட்டருக்கு கூடுலாக ரூ.10 தர முடியாது என்று வாக்குவாதம் செய்யும் வீடியோ வெளியானது. மதுபிரியர் ஒருவரால் எடுக்கப்பட்ட இந்த வீடியோ வாட்ஸ்-அப் உள்ளிட்ட சமூக வலைதங்களில் வைரலாக பரவியது.இந்த விவகாரம் தொடர்பாக டாஸ்மாக் உயர் அதிகாரிகளின் கவனத்திற்கு கொண்டு செல்லப்பட்டது. இதையடுத்து அவர்களின் உத்தரவுப்படி டாஸ்மாக் மேற்பார்வையாளர் பணியில் இல்லாமல் வெளி ஆட்களை வைத்து மது விற்பனை செய்தது உறுதி செய்யப்பட்டது. இந்த புகாரில் மேட்டூர் புதுச்சாம் பள்ளி குருவாக்காடு டாஸ்மாக் கடையின் மேற்பார்வையாளர் முருகனை நேற்று பணி இடைநீக்கம் செய்து டாஸ்மாக் மாவட்ட மேலாளர் குப்புசாமி நடவடிக்கை எடுத்துள்ளார்.