ஆலங்குடி அருகே சட்ட விரோதமாக பாரில் மது விற்பனை :செருப்பு காட்டி போலீசாரை மிரட்டும் திமுக நிர்வாகி!புதுக்கோட்டை மாவட்டம் வணக்கன்காடு கிராமத்தில் உள்ள டாஸ்மாக் கடை அருகே உரிய அனுமதி இன்றி செயல்பட்டு வரும் பாரில் சட்ட விரோதமாக மது விற்பனை நடைபெறுவதாக அந்த கிராமத்தை சேர்ந்த சிலர் வடகாடு போலீசாருக்கு தகவல் தெரிவித்துள்ளனர்.இந்த சம்பவம் குறித்து வடகாடு போலீசார் நடவடிக்கை எடுக்காததால் ஆலங்குடி டிஎஸ்பிக்கு பொதுமக்கள் அளித்த புகாரின் அடிப்படையில் டிஎஸ்பி தீபக் ரஜினியால் அமைக்கப்பட்ட தனிப்படையை சேர்ந்த இரண்டு போலீசார் அந்த பாரில் அதிரடி சோதனை நடத்தி அங்கு சட்டவிரோத மது விற்பனையில் ஈடுபட்டுக் கொண்டிருந்த பரிமளம் என்பவரை கைது செய்து இருசக்கர வாகனத்தில் காவல் நிலையம் அழைத்துச் செல்ல முயன்றுள்ளனர்.அப்போது அங்கு வந்த திமுக நிர்வாகியான மதியழகன் என்பவர் தனது ஆதரவாளர்கள் சிலருடன் போலீசாரை வழிமறித்து அவர்கள் கைது செய்து அழைத்துச் சென்ற பரிமளத்தை விடுவிக்க முயன்றதோடு தனிப்படை போலீசார் இருவரையும் ஆபாசமாக பேசி காலனியை கொண்டு மிரட்டும் காட்சிகள் தற்போது சமூக வலைதளங்களில் வைரலாக பரவி வருகிறது. திமுக நிர்வாகியின் மிரட்டலையும் கடந்து இரண்டு தனிப்படை போலீசாரும் திறம்பட செயல்பட்டு சட்டவிரோத மதுபான விற்பனையில் ஈடுபட்ட பரிமளத்தை கைது செய்து காவல் நிலையம் அழைத்து வந்தனர்.இதனிடையே தனிப்படை காவலர்களை மிரட்டிய திமுக நிர்வாகி மதியழகன் மற்றும் அவரது ஆதரவாளர்கள் மீது போலீசார் இதுவரை எந்தவித நடவடிக்கையும் எடுக்காமல் இருப்பது பொதுமக்கள் மத்தியில் வேதனையை ஏற்படுத்தியுள்ளது.