அருங்காட்சியகத்தை சைகை மொழிகளில் ரசித்த மதுரை பெண்கள்அடடா... கீழடி அருங்காட்சியகத்தை இதுபோன்ற சைகை மொழியிலும் ரசிக்க முடியுமா..? - அசத்திய மதுரை பெண்கள்கீழடி அருங்காட்சியகத்தில் வாய் பேச இயலாத மற்றும் காது கேட்க இயலாத பெண்கள் ஒரு குழுவாக வந்திருந்து, ஒருவர் அழகாய் சைகை பாஷையில் விளக்க மற்ற பெண்கள் அதேபோன்று வினா தொடுக்க ஒவ்வொரு அரங்கத்திற்குள்ளும் சென்று அவர்கள் ரசித்து மகிழ்ந்தது பார்வையாளர்களிடம் பெரும் உற்சாகத்தை ஏற்படுத்தியது.சிவகங்கை மாவட்டம் திருப்புவனம் தாலுகாவில் அமைந்துள்ள கீழடி கள அருங்காட்சியகம், தற்போது மிகப் பெரும் சுற்றுலாத் தளமாக உருவெடுத்துள்ளது. நாள்தோறும் ஆயிரக்கணக்கான உள்ளூர் மற்றும் வெளியூர் சுற்றுலாப் பயணிகள் வந்திருந்து ஒவ்வொரு அரங்குகளையும் மிக ஆர்வத்துடன் பார்வையிட்டுச் செல்கின்றனர். தற்போது கோடை விடுமுறை என்பதால் குழந்தைகள், பள்ளி-கல்லூரி மாணவ, மாணவியரின் வருகையும் அதிகரித்து வருகிறது.இந்நிலையில் அனைத்து மதுரை மாவட்ட காது கேளாதோர் சங்கத்தின் சார்பாகசேர்ந்த வாய் பேச இயலாத மற்றும் காது கேட்க இயலாத மாற்றுத்திறனாளி பெண்கள் ரம்யா, தாரணி, யோகேஸ்வரி, ஜெஸிமா, ராஜலட்சுமி, வித்யா, பெருமி, அபி, முத்துகாளீஸ்வரி மற்றும் பிரியங்கா என பத்து பேர், ஒரு குழுவாக கீழடி அருங்காட்சியகத்தைப் பார்வையிட வந்திருந்தனர். அந்தக் குழுவைச் சேர்ந்த வித்யா, அங்குள்ள படங்கள் மற்றும் தொல்லியல் பொருட்கள் குறித்து சைகை மொழியிலேயே வந்திருந்த பிற பெண்களுக்கு விளக்கினார். அவர் விளக்கத்தில் ஏதேனும் சந்தேகம் இருந்தால், மற்ற பெண்கள் சைகை மூலமாகவே கேள்வி எழுப்பினர்.அமைதியாய் கண்டு களித்து ரசிக்க வேண்டிய அருங்காட்சியக வளாகத்தில் பிற சுற்றுலாப் பயணிகள் சத்தமிட்டு அரங்கின் இயல்பைக் குலைக்கும் சூழலில், இவர்கள் ரசித்த விதம் பார்வையாளர்களை பெரிதும் ஈர்த்தது. சிறப்பான விளக்கமளிக்கும் தங்களது தோழிக்கு கைகளை உயர்த்தி உள்ளங்கைகளை அசைத்து பாராட்டு தெரிவித்த விதம் பார்க்கும் நமக்கே உற்சாகம் தருவதாக அமைந்தது.இதுகுறித்து தாரணியிடம் பேசினோம். அவர் கூறும்போது, கீழடி போன்ற வரலாற்றுச் சிறப்பு மிக்க இடங்களைப் பார்ப்பதில் எங்கள் குழுவினருக்கு எப்போதுமே அலாதியான ஈடுபாடு உண்டு. இன்றைக்கு நேரம் கிடைத்ததால் எல்லோரும் கிளம்பி வந்தோம். எங்களில் சிலர் தையல் தொழில் செய்கிறோம். சிலர் அரசு பயிற்சி நிறுவனங்களில் பயின்று வருகிறோம். கீழடியில் நமது பண்டைய கால மக்களின் வாழ்வியல் எச்சங்களைப் பார்வையிட்டது பெரும் மகிழ்ச்சியை ஏற்படுத்தியுள்ளது. மீண்டும் ஒருமுறை வர வேண்டும் என்ற தாக்கத்தை ஏற்படுத்தியுள்ளது' என்றார்.