"Photo Shoot ஆட்சி" விஜயபிரபாகரன் விமர்சனம்!தமிழ்நாட்டில் முதல்வர் ஸ்டாலின் வெறும் போட்டோ ஷூட் ஆட்சி தான் நடத்தி வருகிறார்-தருமபுரியில் தேமுதிக தலைவர் விஜயகாந்த் மகன் விஜய பிரபாகரன் பேட்டி. தருமபுரியில் தேமுதிகவினரின் இல்ல நிகழ்ச்சிகளில் பங்கேற்க இன்று தேமுதிக தலைவர் விஜயகாந்தின் மகன் விஜயபிரபாகரன் வருகை புரிந்தார். பின்னர் செய்தியாளர்களை சந்தித்த விஜயபிரபாகரன், தமிழக முதல்-அமைச்சர் மு.க. ஸ்டாலின் சிங்கப்பூர், ஜப்பான் உள்ளிட்ட வெளிநாடுகளுக்கு தொழில் முதலீடுகளை ஈர்ப்பதற்காக சென்றுள்ளார். ஏற்கனவே துபாய் உள்ளிட்ட ஐக்கிய அரபு நாடுகளுக்கு சென்று எந்த முதலீடுகளை தமிழகத்திற்கு கொண்டு வந்தார் என்று தெரியவில்லை. அவரது வெளிநாடு சுற்றுப் பயணத்தில் நல்ல திட்டங்கள் கொண்டு வந்தால் வரவேற்பே்போம். இந்த பயணம் எந்த மாற்றத்தையும் ஏற்படுத்தப் போவதில்லை. 2000 ரூபாய் நோட்டுகள் வருகிற செப்டம்பர் மாதம் 30-ம் தேதி வரை வங்கிகளில் செலுத்தி மற்ற மதிப்பீட்டு நோட்டுகளை பெற்றுக் கொள்ளலாம் என்று ரிசர்வ் வங்கி அறிவித்துள்ளது. 2000 ரூபாய் நோட்டு செல்லாது என்று அறிவிக்கப்படவில்லை. இது கருப்பு பணத்தை ஒழிக்கும் நடவடிக்கையாகவே நாங்கள் கருதுகிறோம். எனவே அதை நாங்கள் வரவேற்கிறோம். தி.மு.க. ஆட்சியில் சட்டம் ஒழுங்கு கெட்டுவிட்டது. கள்ளச்சாராயம் குடித்து பல உயிர்கள் போய்விட்டது. ஆனால் கள்ளச்சாராயம் காய்ச்சியவருக்கே நிவாரண நிதி வழங்கப்பட்டுள்ளது. என்ன நடக்கிறது என்பதே முதல்-அமைச்சருக்கு தெரியவில்லை. எனக்கு நேரமே இல்லை என்று முதல்-அமைச்சர் கூறுகிறார். ஆனால் ஐ.பி.எல். கிரிக்கெட் பார்ப்பதற்கு 6 மணி நேரம் செலவிடுகிறார். கடந்த 2 ஆண்டு கால ஆட்சியில் மக்களுக்கு எதையும் செய்யவில்லை. நீட் தேர்வு, நகை கடன் தள்ளுபடி உள்ளிட்ட தேர்தல் நேரத்தில் கொடுத்த வாக்குறுதிகளை தி.மு.க. அரசு நிறைவேற்ற வில்லை. மொத்தத்தில் இந்த அரசு போட்டோ சூட் ஆட்சியாகவே இருக்கிறது. மக்களுக்காகவே தொடங்கப்பட்ட கட்சி தே.மு.தி.க. ஆனால் மக்கள் எங்களுக்கு வாக்களிக்கவில்லை. கடந்த 20 ஆண்டுகளுக்கு முன்பே ரேசன் பொருள் வீட்டுக்கே வரும் என தொலைநோக்கு திட்டத்தோடு சொன்னார். ஆனால் அப்பொழுது கேலி, கிண்டல் செய்தார்கள். இப்போது மற்ற மாநிலங்களில் செயல்படுத்தப்பட்டுள்ளது. அதிமுக, திமுக என மக்கள் மாற்றி, மாற்றி வாய்ப்பு கொடுக்கின்றனர். பணம் வாங்கிக் கொண்டு வாக்களித்து விட்டார்கள். இதனால் எங்கள் கட்சிக்கு எந்த பாதிப்பும் இல்லை. மக்களுக்கு தான் பாதிப்பு. வருகிற பாராளுமன்ற தேர்தல் கூட்டணி குறித்து தலைவர் கேப்டன் விஜயகாந்த் முடிவு செய்வார் என தெரிவித்தார்.